|
indietro
Storie de emigrazion viers la Argjentine e l'Uruguay
Javier Grossutti
Lis primis partencis di grups di colons furlans pe Argjentine a van indaûr ai ultins decenis dal Votcent: a jerin lis primis butadis di un flus che al va indenat filât par scuasi un secul, cundut che dilunc dal timp a cambiin lis motivazions. Prime a son partîts contadins che a cirivin gnovis tieris di lavorâ e a àn puartât tes coloniis di Resistencia, Avellaneda, Colonia Caroya, Formosa, San Benito, Sampacho i valôrs de civiltât contadine di origjin; dopo ancje muradôrs, imprenditôrs edîi e fornasârs a son lâts tes citâts di Cordoba, Rosario, Santa Fe, Buenos Aires; dopo e je la volte di grups di personis simpri plui diferentis che a partissin par resons plui complessis che no son simpri dome economichis, furlans, triestins, istrians e dalmatis emigrâts in Argjentine e in Uruguay a formin comunitâts impuartantis e a crein un leam simpri rinovât cul lûc di origjin.
Lis primis partencis di grups di colons furlans “talians” e “austriacs” rivâts in Argjentine tra la fin dal 1877 e i prins agns Otante dal Votcent a son clamadis de pussibilitât di podê vê tiere cun facilitât. La afermazion di valôrs propris de civiltât contadine di partence e je clare, par esempli, tes coloniis furlanis di Resistencia, Avellaneda, Colonia Caroya, Formosa, San Benito, Sampacho.
Tra Votcent e Nûfcent, no dome agricultôrs a migrin in Argjentine, ma ancje muredôrs, imprenditôrs edîi, infermîrs, fornasîrs, inteletuâi tormentâts. Lis metis a son lis capitâls e lis citâts impuartantis tant che Cordoba, Rosario, Santa Fe, ma plui di dut Buenos Aires.
La fin de grande vuere e torne a meti devant dai furlans la sielte de emigrazion tal forest. Tra 1920 e 1930, in ogni câs, no dome resons economichis a sburtin i furlans a passâ l’ocean. I antifassiscj Egidio Feruglio, Rodolfo Kubik, Giuseppe Tuntar, Luigi Tonet, Giovanni Minut e tancj altris furlans e slovens e cravuats dai teritoris finîts sot de Italie a rivin in Argjentine e in Uruguay.
Dopo dal 1945 al torne a tacâ il flus pai paîs di plui antighe emigrazion come la Argjentine e, in part, l’Uruguay. Lis partencis di emigrants e di profucs istrians e dalmatis, in ogni câs, e finìs tor dai prins agns Cincuante. I agns Otante e il rivâ in regjon, tra 1989 e 1991 e tra 1998 e 2002 dai dissendents dei furlans e di chei altris coregjonâi emigrâts di chê altre bande dal ocean e à mostrât la distance tra lis dôs comunitâts, che ognidune e cognosseve di chê altre dome che il stereotip.
fai clic per leggere tutto il documento
|
|
|
web
administrator